🇱🇰 இலங்கை ஆசிரியர் சேவையின் IIஆம் வினைத்திறன்காண் தடைதாண்டல் பரீட்சை – 2026

நாட்டின் தேசிய மற்றும் மாகாணப் பாடசாலைகளில் கடமையாற்றும் இலங்கை ஆசிரியர் சேவை உத்தியோகத்தர்களுக்காக 2026 செப்டம்பர் மாதம் நடத்தப்படவுள்ள IIஆம் வினைத்திறன்காண் தடைதாண்டல் பரீட்சைக்கான வர்த்தமானி அறிவித்தல் 2026.07.17 அன்று வெளியிடப்பட்டது.

இலங்கை ஆசிரியர் சேவையின் 2-II தரத்திற்கு இளங்கலைக் கல்வியியல் பட்டத்தின் அடிப்படையில் நேரடியாகச் சேர்த்துக்கொள்ளப்பட்ட ஆசிரியர்கள் தவிர்ந்த, அத்தரத்திற்குப் பதவியுயர்வு பெற்ற அல்லது இலங்கை ஆசிரியர் சேவையின் 3ஆம் தரத்திற்குச் சேர்த்துக்கொள்ளப்பட்டதன் பின்னர் 2-II தரத்திற்கு நியமிக்கப்பட்ட ஆசிரியர்கள், 2-II தரத்தில் நான்கு ஆண்டுகள் சேவையை நிறைவு செய்வதற்கு முன்னர் இந்த IIஆம் வினைத்திறன்காண் தடைதாண்டல் பரீட்சையைப் பூர்த்தி செய்ய வேண்டும்.

மேலும், 2025.06.30ஆம் திகதிக்கு முன்னர் IIஆம் வினைத்திறன்காண் தடைதாண்டல் பரீட்சையைப் பூர்த்தி செய்யாத போதிலும், அத்தேவையைப் பூர்த்தி செய்ய வேண்டும் என்ற நிபந்தனைக்கு உட்பட்டு 2-I தரத்திற்குப் பதவியுயர்வு வழங்கப்பட்ட ஆசிரியர்களும், ஆசிரியர் சேவையின் தரம் 1க்கு மேலும் பதவியுயர்வு பெறுவதற்கு இப்பரீட்சையைப் பூர்த்தி செய்வது அத்தியாவசியமாகும்.

பரீட்சார்த்திகளுக்குச் சுயகற்றல் முறை பரிந்துரைக்கப்படுகின்றது. e-Thaksalawa இணையத்தளத்தில் IIஆம் வினைத்திறன்காண் தடைதாண்டல் பரீட்சையின் கீழ் வழங்கப்பட்டுள்ள பாடவிடயங்களைக் கற்றுப் பரீட்சைக்குத் தோற்றுமாறு விண்ணப்பதாரர்கள் ஊக்குவிக்கப்படுகின்றனர்.